Don't Miss

「點單」王海斌 科技系統帶人情味 簡化餐飲流程 讓員工多與食客交流

By on October 18, 2021

原文刊於信報財經新聞「周一人物

曾幾何時,食客幫襯街坊小店,為的不止好味,還有一份人情味,惜時移世易,這種店員與食客交流場面已難復見。有說科技使人冷漠,一站式雲端POS餐飲管理系統平台「點單」聯合創辦人王海斌(Ben)認為水能覆舟、亦能載舟,善用科技可減輕飲食業前線員工壓力,讓他們有更多時間與客人溝通互動,重拾人與人之間的「溫度」與情懷;科技與人情不單可並存,甚至能令彼此一起走得更遠。

Ben的飲食業情意結,離不開家族背景關係,其祖父早年是茶樓東主,父母則在筲箕灣經營粉麵店;他小時候跟着長輩到祖父茶樓用膳,看見樓面員工與食客打成一片,氣氛融洽,「到小學我一放學就孭住書包去爸爸媽媽嘅粉麵舖幫手,洗碗、沖咖啡、沖檸檬茶,功課都喺嗰度做,細細個開始接觸,有個淵源。」

王海斌曾在銀行界打滾,但始終心繫飲食業,前年參與創辦「點單」,希望透過POS系統簡化餐廳運作流程。(黃潤根攝)

王海斌曾在銀行界打滾,但始終心繫飲食業,前年參與創辦「點單」,希望透過POS系統簡化餐廳運作流程。(黃潤根攝)

耳濡目染下,Ben大學畢業後雖投身金融銀行界,且做出成績,曾任香港滙豐銀行與Pru Life UK的投資經理、渣打銀行商業顧問等,惟始終心繫飲食業,2015年起,先後與朋友開設茶飲店及日本餐廳,可惜人算不如天算,2019年爆發社會運動,位於尖沙咀的餐廳無奈結業,他決定換個方式,參與創辦「點單」,一開始為餐廳做電子餐牌,其後研發出一站式POS餐飲管理系統,把堂食訂購流程數碼化。

科技往往予人冷冰冰和疏離感,然而「點單」在研發POS系統的背後,有一份充滿熱度理念,希望透過科技,減少或簡化繁複的作業流程,從而加強餐廳與食客之間聯繫,「以前餐廳只做街坊生意,已夠養起成頭家,唔似而家一定要坐爆晒;往時大部分都係熟客,嚟到(夥計)認到佢哋、叫到個名,(熟客)昨日嚟完今日又會再嚟,大家吹下水。」

「點單」系統讓食客自行掃碼落單及結賬。(受訪者提供)

「點單」系統讓食客自行掃碼落單及結賬。(受訪者提供)

「而家個問題係(食肆)為咗維皮、出糧,(每日)要做好多轉(生意)先得,好多時我哋出去食飯,會發現食食吓(夥計)已經企喺側邊,開始幫你執緊嘢,其實想盡快做多轉。無辦法,租金貴、(食材)物價貴、人工貴,做少一轉半轉已差好遠,所以我哋成日都講,食物溫度仲有,人同人之間嘅『溫度』就無咗。」Ben道出經營難處。

掃碼落order 兼自助結賬

今時今日,飲食業前線員工總是手忙腳亂,忙着替客人落單、入單、催廚房出菜,「如果你營運一間餐廳,會發覺一般係好簡單、好重複嘅工序,但又一定要人去處理,員工幾乎有70%時間兼顧緊呢啲營運上嘅嘢,以落單為例,侍應行嚟你身邊:『先生食啲咩?』,其實客人仲睇緊餐牌,佢企喺度等,又照顧唔到其他枱。」

「點單」亦提供跨區外送服務。(點單網站截圖)

「點單」亦提供跨區外送服務。(點單網站截圖)

透過「點單」POS系統,客人只要在座位用自己手機掃描QR code,即可自助落單及結賬,節省員工寫單、入單、埋單所需時間,可減低他們60%至70%工作量,Ben強調此舉絕非鼓勵減少人手,反而可讓員工有更多時間跟食客交流,提升服務質素,長遠有助留客。

人情味不止來自員工與食客互動,還有老闆對員工的體恤,Ben解釋,飲食行業工時長、辛苦、環境差和壓力大,長期人手短缺,若老闆可改變管理和服務模式,未來有望吸納更多新血。

願景美好,惟樓面員工「手寫紙仔」入單習慣由來已久,他不諱言向食肆推介POS系統曾被潑過不少冷水,「開始時超級難,香港唔知點解,喺科技應用上比較慢,尤其餐飲科技,第一樣『掃QR code』已經係難題,兩年前我哋仲要喺手機度裝個軟件先得,教個客(餐廳)點裝,非常繁複。」

「點單」每月定期舉行義工等團隊活動。(受訪者提供

「點單」每月定期舉行義工等團隊活動。(受訪者提供)

「到今年唔同晒,手機已經內置(掃QR code功能),同埋政府『安心出行』幫咗好多,大家慣咗掃一掃。」另一方面,新冠疫情下,市民衞生意識大大提高,人們擔心餐牌及落單紙不衞生,「始終用自己手機,唔使接觸人哋嘅嘢,放心好多。」

整理財務數據 方便申借貸

社會不斷進步,他相信在後疫情時代,餐牌電子化、無接觸落單與結賬是大勢所趨。現時其公司的POS系統,獲本地近千間食肆採用,「嚟緊希望幫啲客戶喺開源節流方面做多啲嘢,節流主要做緊點樣喺食材入貨平啲。」項目現處測試階段,預計今年第四季或明年初推出。「第二,如果食肆願意,我哋系統可以幫佢哋整理財務數據,等銀行根據佢哋營業額提供credit line(貸款信用額度)。以前呢門生意問銀行借錢好難,所以cash flow(現金流)好緊張,往往執笠係因為突然周轉唔嚟,如果我哋證明賺到錢,或者每月營業額係夠嘅,金融機構畀到個credit line,唔需要好長,一兩個月已經夠周轉。」Ben如是說。

王海斌(右)與拍檔King志同道合,同樣來自飲食世家。(黃潤根攝)

王海斌(右)與拍檔King志同道合,同樣來自飲食世家。(黃潤根攝)

「點單」亦提供跨區外送服務,他解釋,傳統POS公司只出售系統,不會有後續服務,如有問題按次收費,或一開始收取昂貴保養費。其他外賣平台送餐範圍只在直徑2.8公里內,繁忙時段更不斷收窄,「我哋宗旨係同業者一起成長,唔係只專注賺佢哋嘅錢」,Ben期望透過科技打造生態系統,除可做美食,員工更能提供有溫度服務,令昔日人情味再現。

顧客食過翻尋味,出品水準固然重要,能與員工閒話家常,也是舌尖上的另一種滿足。

1018_P29

採訪、撰文:許鎮邦

攝影:黃潤根、受訪者提供

更多「周一人物」文章:

支持 StartupBeat

如欲投稿、報料,發布新聞稿或採訪通知,按這裏聯絡我們