新冠疫情下，市場對流動病毒檢測服務需求大增；本地老字號臘味店金菊園第四代、時尚名媛黎曉靈（Kimmy），自小遺傳家族的創新基因，事業生涯多次創業，去年底與中文大學醫院合作，推出流動採樣車，本錢尚未收回，已急不及待於近日再推成本大10倍、設負壓醫療室的「流動採樣車2.0」，她說「蝕住做」只因一個理念：「幫咗香港先，錢慢慢至講，香港係我屋企，香港死我都死啦！」
金菊園由Kimmy的曾祖父所創，是本港老字號臘味及燒味店，她是家中孻女，自小在舖頭「打躉」，「由細到大都諗住做飲食，但唔夠膽，始終長輩做得太好。」然而，做生意念頭則根深柢固，「我其實成世人未打過工，一直都係創業」，中學時代她曾於日本當模特兒，只屬興趣，16歲在港成立活動製作公司，主要籌備時裝表演及娛樂場所開幕禮等。
「不過，搞搞吓覺得，點解剩係幫其他牌子宣傳呢？於是去做時裝代理，我本身係超級購物狂，爸爸都話我買咁多嘢，不如索性自己做，嗰陣未夠18歲。」Kimmy憶述，在那5、6年間代理過不少國際知名品牌，因經常贊助明星藝人服飾，相交滿天下，如郭富城、鄭秀文、南韓G-Dragon權志龍（樂壇組合BIG BANG成員）等，「Angelababy（楊穎）第一個時裝表演，都係幫我哋行。」
惟部分她代理的牌子後來陸續上市收回代理權，Kimmy有感「幫人湊大個仔又被收番」，2008年把心一橫把公司賣盤，轉戰珠寶設計，繼而成立個人品牌，至2017年再拓新跑道，創辦愛多國際，從事國際貿易、投資及電子商貿網上平台，曾於浙江義烏舉行的一場網紅銷售活動，創出單日22億元人民幣銷售額佳績。
二〇一六年Kimmy父親病逝讓她重新思考人生；圖為她童年與父親的合照。（受訪者提供相片）
助海外多國搜購醫療物資
觸發Kimmy進軍醫療用品市場，是去年初武漢率先爆疫，一方有難、八方支援，她因與時任國家衞健委高級別專家組組長鍾南山及其團隊有交情，出於幫手心態，為武漢在全球搜羅醫療物資，如酒精消毒液、口罩及呼吸機等，「以前酒精消毒液一般60%濃度，廠商好少做到70%以上，驚爛手，但新冠病毒要75%先殺到。」
從事過珠寶生意的她，向素有合作的以色列政府求助，對方答應提供物資，「以色列最出名兩樣嘢：珠寶同酒精消毒液」；她又接觸其他國家洽購，然後透過中國扶貧基金會捐予武漢，因各地時差不同，試過由早上9時到翌晨7時做足22個鐘，小睡片刻又趕工，「唔係為賺錢，係知好多人等住呼吸機同口罩救命。」經此一役，不少外國政府得知Kimmy等人為中國搜購物資，留下印象，未幾疫潮逆轉，海外多國相繼淪陷，「先係澳洲政府搵我哋，之後新加坡、印度、巴西……叫我哋幫手喺中國買呼吸機、口罩，其實巴西政府完全唔識我，只係當地疫情嚴重，知道有人可以幫手，畀咗成千萬美金，我哋仲講笑，不如執咗間公司走佬。」
這個「國際任務」殊不簡單，中國當局要求她有採購函才肯賣貨，於是急忙聯絡巴西方面要求提供，「後來至知，過程中巴西衞生部長換咗3個人，3個都先後中招入院，喺ICU（深切治療部）簽文件畀我哋；喂，人哋咁辛苦仲幫你簽，你好唔好意思做唔到畀人？」
「內地嘅嘢，做唔到就做唔到；有次印度政府搵我哋同其他供應商買口罩，包機嚟中國攞物資，點知我搵嗰間清關公司有問題，那批口罩出唔到關，印度方面話：『唔使喇Kimmy，等唔到你。』」最終只好向國家衞健委坦承難處，對方知她屬有心人，「特事特辦」快速批了出入境許可證，「真係神蹟，平時出呢啲第三類醫療用品證，起碼要幾年，我哋10日搞掂。」
6輛流動採樣車，每部改裝成本約15萬元，從構思到實行只有短短兩星期。（黃俊耀攝）
六輛去年底落地 遊走各區
過去一年疫情反反覆覆，去年12月，Kimmy再次發揮創新精神，與中文大學醫院合作，推出6輛流動採樣車，每部改裝成本約15萬元，從構思到實行只有短短兩星期，同時出售自助檢測套裝，「當時第三波疫情剛完，如果老人家有咩事，點去社區中心（檢測）？如果一幢樓有超級傳播者，但未搵到係邊個，你叫佢去社區中心，咪會散播病毒？」
她解釋緣何有這計劃：「有日我個修甲姐姐突然十萬火急打電話嚟，話要自助檢測套裝，原來佢之前一晚同人食飯，對方中咗，我話搵人送去佢屋企，佢講而家搭港鐵嚟攞，我叫佢即刻返屋企困住自己，就係呢件事啟發我做流動採樣車，而且一開始已經知要整負壓醫療室。」
可是知易行難，她把想法告知工程師、建築師朋友，人人皆說不可能，因車輛面積太小；當時第四波疫情蠢蠢欲動，Kimmy果斷決定先做未有負壓醫療室的採樣車，以解燃眉之急，「結果（第四波）真係爆，12月15日做完架車，第二日就出動落區去彩虹，之後鯉魚門、油麻地。」
第二代具負壓室 可當接種站
第一代採樣車剛落地，Kimmy並未放慢腳步，積極與團隊及中文大學醫院等合作夥伴研究，如何加設負壓醫療室，結果今年2月成功將旅遊巴改裝成「升呢版」流動健康車，共設6間負壓醫療室，均有HEPA濾網及紫外線殺菌燈，換鮮風次數為每小時25次，較公立醫院病房的每小時12次更頻密，未來或可用作流動疫苗接種站。
「可能有人覺得我儍，應該第一代（採樣車）用到盡先至出第二代，iPhone都唔會隔唔夠兩個月就出新款；同埋我第二代一出，第一代嗰6部基本報廢」；第二代採樣車每部成本達150萬元，且欠缺政府資助，回本遙遙無期，難得她毫不介懷，「爸爸教過我一樣嘢，做生意唔係下下為搵錢，創造咗個價值先講。」疫下本港各行業受到不同程度打擊，也造就一些新機遇，只要對準目標，且切合需要，不難「創」出新路。
流動健康車共設6間負壓醫療室，均有HEPA濾網及紫外線殺菌燈，換鮮風次數為每小時25次。（黃俊耀攝）
採訪、撰文：許鎮邦 攝影：黃俊耀、受訪者提供
—————————————————-
黎曉靈（Kimmy）小檔案
職銜：愛多國際控股（Adore）創辦人
年齡：八十後
學歷：澳洲昆士蘭大學（University of Queensland）畢業，主修電子商貿
星座：山羊座
簡介：有「時尚名媛」之稱，中學時代曾做模特兒，早年從事時裝代理，其後成立珠寶品牌，2017年創辦愛多國際，主攻國際貿易、投資及電子商貿網上平台；去年底與中文大學醫院合作，推出新冠病毒流動採樣車；2019年獲頒「大灣區傑出女企業家獎」
