You are currently at: ejtech.hkej.com
Skip This Ads
Don't Miss

不成功便成仁

By on January 21, 2016

本文作者莊偉忠為現職一田百貨行政總裁,先後做過六種行業,十四間機構,開過一間銀行,崇尚返璞歸真的營商信念,以人為本,憑「不開會」、「打工是副業,正職是做人」、「超市執籃員」名聞江湖,全文刊於莊偉忠Facebook ,文章獲授權轉載。

本文作者莊偉忠(黃潤根  攝)

本文作者莊偉忠(黃潤根 攝)

一年之計在於春,一日之計在於晨,有遠見嘅人成日都咁講,可惜我由細到大本質上只係廢青一個,唔鍾意計劃將來,無乜興趣登高遠望,習慣見步行步,隨機應變,將五尺範圍內嘅事做到最好,所以春天、清晨都唔啱我,呢種性格從來無變過,亦無諗過改。

偏偏人在江湖,收咗人錢,職責所在,無得蛇王呑泡,無論平日點懶惰,點樣放權交託,每年嘅升職、加薪、年終獎金、業務預算四大任務,通通要自己赤膊上陣,趕喺一月中前起貨,然後鼓其餘勇,身先士卒,永遠將戰友嘅利益放喺第一位,向上據理力爭,力陳利害,預咗行先死先,打死罷就,不成功便成仁。

但係要記住,無論講得幾漂亮,抑或左閃右避,乜都唔敢講,醜婦終須見家翁,大事臨頭,市道低迷,試一試就好清楚,只要畀人發覺原來無膽量,順口開河大隻講,千方百計卸膊,淨係識轉述上頭無理指令,借勢剝削,唔將同事利益放喺心上,毫無道義承擔,從今以後唔使旨意有人肯同你搏。

過去八年,人哋點諗,唔清楚,自己覺得問心無愧囉,舊年咁講過:「我盡咗力㗎啦,雖然未至於心力交瘁,但真係攰到趴街,係時候返屋企攬吓老婆,再整啖脷搭脷French Kiss囉。」今年又要講多趟,信念原則一模一樣,唯一嘅分別係,自己老咗,殘咗,體力差咗,對眼矇咗,對上三日夾埋瞓唔夠十粒鐘,?家打茄輪都無力,好想好想抖抖,長抖好過短抖,短抖好過無得抖,無得抖遲早提前早抖,咁樣做人好無奈,唔使預我。

我鍾意創作,唔鍾意忙,亦唔鍾意同事咁忙,忙得滯又點識創作,無能無良無賴上司至鍾意手下喪忙,但係食得鹹魚抵得渴,?家交咗功課,耐心等候發落,不成功便成仁,我發誓,因為我有勇氣、道德同埋膽量。

支持EJ Tech



如欲投稿、報料,發布新聞稿或採訪通知,按這裏聯絡我們