Don't Miss

GogoVan 是不是邪惡軸心

By on April 11, 2015

本文作者SOR9Y為打工仔出身,現為一家中小企科技公司合伙人,粗口爛舌,以串人為己任。

GoGoVan Facebook專頁

GoGoVan Facebook專頁

最近,有貨車司機到 GOGOVAN 總部抗議(詳見報導),抗議內容主要有幾點:

  1. 近日降低晚間附加費,操控價格,減低司機收入
  2. 「亂收車」,容許非業界司機加入車隊

GOGOVAN 及後有回應。因為呢件事,有人開始覺得 GOGOVAN 其實同百佳一樣,都係先佔巿場,然後欺壓司機。但我覺得大家都捉錯重點。

首先搞清楚,GOGOVAN 係一家公司,公司係要賺錢嘅。如果大家一直有跟進 GOGOVAN 嘅發跡史,你會知道 GOGOVAN 本來係打算免費一年後向司機收費(大約係每張單嘅 7-10%),但當 GOGOVAN 推出時,不幸被 EasyVan 搶佔巿場,於是收費計劃告吹。直至現在,GOGOVAN 喺香港都無任何收費。但大家留意,GOGOVAN 喺香港一如其他電召台,係有 call center 嘅,顧客除咗可以打電話 call 車,call center 亦會主動跟進協調司機同乘客嘅問題(例如司機甩底,或者唔肯接單)。呢啲支出邊個俾?當然係來自 GOGOVAN 嘅投資者,所以 GOGOVAN 喺香港其實一直都燒緊錢。

GOGOVAN 早幾個月透過合伙方式進軍台灣,當然就唔會同香港一樣燒錢:每單柯打,司機賺八成,合伙人賺一成,GOGOVAN 賺一成。所以,GOGOVAN 做咗兩年,去到台灣先真正開始有收入。好喇,咁點解香港明明無錢賺都要做?

主要係因為 GOGOVAN 喺香港起家,如果而家香港呢邊執笠的話,肯肯定會俾街外人笑死。而只要 EasyVan 之類嘅競爭者一直存在,香港呢個巿場亦永遠唔會向司機收費。所以,GOGOVAN 喺香港嘅目標只有一個:成為巿佔率最高嘅 call 車公司。咁你會開始明白點解佢會主動降價,因為只要打低埋現存嘅 call 台,佢就會係巿佔率最高嘅公司,而且無人取代。但成為最大之後係咪就會收費賺司機錢呢?

呢個問題唔喺 GOGOVAN 度,而係要問埋 EasyVan。一日兩間公司仍然打生打死,都唔會有人敢喺香港收錢。大家到時要擔心嘅反而係兩間公司到時會唔會合謀定價,因為要收,就一定係一齊收。但以兩間公司嘅「友好」關係,我唔覺得呢件事會喺三幾年內發生。

所謂「亂收車」,用上面嘅理由一樣講得通。

所以,我覺得現時嘅問題並唔在於 GOGOVAN 有否欺壓司機,而係班司機用咗 GOGOVAN 一類嘅 call 車平台之後,仲肯唔肯俾錢上傳統 call 台?當司機一方面鬧 GOGOVAN 壓價,傳統台呢一年內其實係不停咁加緊價希望司機肯留低,但肯上台嘅司機仍然係越來越少。

如果你問我 GOGOVAN 是否邪惡,我會話最少喺香港唔係,最邪惡嘅反而係呢班貪免費又想賺到盡嘅司機。如果司機覺得 GOGOVAN 欺壓,其實只要你集體唔用 GOGOVAN,佢一定要加價留人,但司機們你哋團結到咩?想當年 GOGOVAN 推出時,各大 call 台想聯手打壓,但結果係每間 call 台都出一個自己品牌嘅 call 車 App,而無一個夠 GOGOVAN 打。連 call 台都係咁,旨意班司機團結?哈哈哈!

 

原文刊於作者網誌「SOR9Y」

支持 StartupBeat

如欲投稿、報料,發布新聞稿或採訪通知,按這裏聯絡我們