波仔打造Wave工廈唔憂賣 (麥狄文)

By on April 19, 2017

本文作者麥狄文(徐狄怡)為證監會持牌人,在《信報》撰寫專欄「金融街密語

中資高價搶地已經唔係乜嘢新聞,海航高價搶奪啟德住宅地皮令市場嘩然,不過中資喺香港掃貨,亦唔係下下都可以買中心頭好。阿Man最近就聽到,有中資銀行喺東九龍出手掃貨,但最終鎩羽而歸。話說波叔孻仔阿Stan(波仔)位於觀塘嘅活化工廈The Wave,本來有中資銀行洽購,但最終都係甩咗轆傾唔成,十居其九都係價錢傾唔啱數。

睇番呢幢位於觀塘興業街嘅工廈,係波叔喺2009年以近1.8億元買入,再成功喺2016年初成功搭上活化工廈尾班車,向地政總署提出活化成銀座式商廈,地下為停車場及餐廳,2至6樓改為商場,其餘樓層則改建為商務中心,仲改埋個潮名「Wave」。

項目一直由波仔打理,經過活化之後,租金幾級跳,由過往平均10元,目前狂升至34元一呎,更有餐廳以呎租50元進駐場內。樓上部分樓層以2000至8000元租予創業者作為辦公室及「共用工作空間」。有記者參觀上址亦見已有不少人工作,甚至有人在上址開playgroup,猶如民間版的科學園。

位處九龍東成搶手貨

聽聞呢個項目已開始有錢賺,波仔食髓知味,想喺明年初用Wave呢個品牌再搞多間分舵。雖然分舵未必再係全幢咁大規模,但波叔旗下物業眾多,要喺其中一啲工廈,拎番幾層出嚟再搞活化,變身分舵亦非難事。

查實早喺舊年The Wave獲批活化之後,波叔一度想以逾10億元放售全幢物業,亦曾有基金洽購,後來基金縮沙,交易告吹。不過活化工廈已經截龍,可改裝工廈買少見少,呢件貨基本上唔憂賣。其實除咗工廈活化吸引之外,The Wave身處嘅九龍東,早喺2011至2012年《施政報告》已提出,為咗解決核心商業區(CBD)商廈供應有限呢個問題,政府將投資逾千億元發展該區,為香港打造新CBD。正因為呢個原因,海航先會咁大手筆掃入啟德住宅地。

海航買嘅係住宅地,同樣係中資集團但基地位於香港嘅高銀集團,旗下兩間香港上市公司高銀地產(00283)同高銀金融(00530),早喺2011年已成功投得九龍灣地皮,並用作興建其總部「高銀金融環球中心」。呢座九龍東黃金地段嘅地標式商業大廈,已喺去年最後一季入伙。作為高銀總部,為咗配合識飲識食嘅老闆潘蘇通,仲自設咗幾間高級食府,無論老闆自己開飯或者招呼客人,都可以喺自己總部範圍內搞掂。

將來會有愈來愈多中資機構喺九龍東插旗,波仔喺觀塘嘅The Wave可以話係搶手貨,難怪波仔賣唔成呢件貨亦未有影響心情;加上波叔基本上未停過手掃貨,單係今年1月至今,已動用50億元資金掃入工商物業。老豆咁積極掃貨,阿仔又點會急住出貨,所以波仔賣The Wave亦嘆慢板,交易價至少要執過10億元先有得傾,估計出手冇12億元,波仔亦未必會割愛。

更多麥狄文文章:

支持 StartupBeat

如欲投稿、報料,發佈新聞稿或採訪通知,按這裡聯絡我們