You are currently at: ejtech.hkej.com
Skip This Ads
Don't Miss
Home   >   人物專訪   >   高齡創業睇時機 尋夢不怕遲

高齡創業睇時機 尋夢不怕遲

By on February 6, 2017

原文刊於信報財經新聞

57歲銀行家劉曉黎，曾於銀行界工作20多年， 與兩位拍檔創辦移動付款App銀傳。

57歲銀行家劉曉黎，曾於銀行界工作20多年， 與兩位拍檔創辦移動付款App銀傳。

近年港人壽命冠絕全球，活到80、90歲實屬等閒；隨着戰後嬰兒潮世代（Baby Boomers）陸續達退休年齡，不少「五十後、六十後」完成人生上半場後，都選擇換跑道，在商界繼續發光發熱，令高齡創業逐漸成為潮流；部分或屬玩票性質或打發時間，但亦有很多是決心再創一番事業。

本報訪問兩位高齡創業者，當中有人放棄銀行高薪厚職去創業，也有人將家族批發生意賣盤，轉攻零售；他們均認為，年齡不應成為創業障礙，只要有興趣有能力、抓緊市場時機，有心唔怕遲。

銀行家嫌支票煩啟發搞App

57歲的銀行家劉曉黎，曾於銀行界工作20多年，2015年突然辭去瑞信高層職務，與兩位拍檔創辦移動付款App——銀傳，理由是不想寫支票，「以前工作同生活上經常要寫好多支票，覺得好麻煩」，故幾年前已希望發展移動支付平台，但因成本門檻太高而卻步，直到近年FinTech（金融科技）概念興起，「infrastructure（基礎設施）平咗好多」，才達成創業理想。

由打工仔變成創業者，上至公司決策、租辦公室，下至找人駁電話、清潔等，所有事情都要「一腳踢」，但劉曉黎認為，創業最難是「冇人話你知做啲乜、點樣做，加上我哋算係新行業，好多嘢要邊行邊學」；身份也要重新適應，「以前做大行，外人多少對你有啲respect（尊重），而家乜都要從頭來過。」

幸好他本身在銀行界浸淫多年，累積不少人脈， 成為高齡創業一大優勢，「有咩事就逐個cold call搵朋友，再由朋友refer（推介）相關人士幫手」；俗語有云「力不到不為財」，劉曉黎不諱言，創業者基本上沒有收工時間，且要365天不停做，絕對勞心勞力，「以前做銀行都叫賺到啲錢，所以家人好支持同鼓勵我創業，否則的話，壓力太大好易爆煲。」

現時他每天早上5時許便起床，一直工作至深夜，被問到創業路艱辛，何必仍偏向虎山行？他直言從事銀行業多年「其實好悶，做來做去都係嗰啲嘢， 瞇埋眼都識做」，既然如今生活無憂，體力上亦應付到，遂決定走出安全區，「年齡唔係問題，主要睇你有無興趣同能力去捱，而家有個自己嘅平台畀我發揮創意，只要有好嘅idea，我相信自然會賺到錢。」

雖然信心爆棚，但創業挑戰往往層出不窮。金融管理局去年8月開始向合資格的儲值支付工具（SVF）發行人發牌，但銀傳卻榜上無名，被迫暫停轉賬服務，劉曉黎已積極與當局開會爭取發牌，「最壞打算咪將公司轉型囉」，他認為創業者一定要樂觀，做自己喜歡的事情，堅持並做到最好，就有機會成功。

六十後的呂守達（下圖左）外表年輕，不惜把家族拉鏈廠生意賣盤，開設全港首間飛鏢道場「JDarts」（上圖），實現多年夢想。

六十後的呂守達（下圖左）外表年輕，不惜把家族拉鏈廠生意賣盤，開設全港首間飛鏢道場「JDarts」（上圖），實現多年夢想。

售家族生意 開飛鏢道場

「創業係睇市場時機，唔係講創業者嘅年紀」，同屬「六十後」的呂守達，外表看來遠比真實年齡年輕；本身家族經營拉鏈廠的他，幾年前毅然將生意賣盤，　把資金用來開設全港首間飛鏢道場「JDarts」，實現多年夢想。

呂守達是飛鏢發燒友，接觸該項運動近30年，多年來經常去不同國家及地區，購買各種飛鏢產品，收藏品不少；後來他因意外弄傷手腕，不能再掟鏢，但仍希望為飛鏢運動出力，遂決定經營道場售賣飛鏢用品。

由於「食正」本地飛鏢熱潮，首間道場開業7個月已回本，現時在銅鑼灣、旺角共有三間道場，馬來西亞和新加坡也有分店，今年更打算進軍台灣。

雖然做慣生意，但人到中年才由批發轉戰零售， 呂守達直言「創業」與「守業」性質完全不同，「以前做批發，主要係同其他生意人打交道，拉鏈廠本身有商譽，儲落一班熟客，難度相對冇咁高；而家飛鏢道場嘅客源多數係年輕人，後生仔不嬲貪新鮮，要不斷留意佢哋口味轉變，係會有困難。」

他認為，與上世紀90年代相比，如今做零售困難大得多，因無論市道好壞，租金永遠企硬，零售業須準確預測市場趨勢，及早起步才能站穩陣腳，「現時全港約有150間飛鏢道場，但賺錢嘅唔超過5間」；或許有人覺得他年近50才二次創業有點遲，但其實以行業計，JDarts可說本地先鋒，「所以創業係睇『市場年紀』，唔係個人。」

採訪、撰文：許鎮邦　攝影：何澤

支持EJ Tech



如欲投稿、報料，發布新聞稿或採訪通知，按這裏聯絡我們。