Don't Miss

WhatsApp定WeChat?(六角都市)

By on November 28, 2015

原文刊於信報的副刊文化專欄

WhatsApp-and-WeChat

面書創辦人都已經在清華大學的講台上用國語演講了,中國脫離「世界上用不到面書的幾個國家」之列的日子還會遠嗎?在北京上面書,有時都醒唔起究竟是在用香港的數據漫遊還是在用VPN,反正照上無誤,科技的大潮確實無鐵幕不摧。

不過在北京講「提升社交媒體中的個人品牌」,香港人和內地同胞立時如港隊對國足一樣壁壘分明。

WhatsApp定WeChat?就這樣一個簡單問題,一枱人登時理智全失,什麼功能、界面、個人資料保密程度,全然廢話,一個即時通訊應用程式,竟然都係國家民族的問題。

想都未想過

香港人說:「我們」在香港多數用WhatsApp,WeChat只用來和內地同事談公事。

內地人說:WeChat好用,一個程式就頂得上「你們」的WhatsApp加Facebook加LinkedIn。

香港人說:那是因為「你們」沒有Facebook。

無謂自我膨脹,事實確是WeChat用途和功能比WhatsApp強太多。打開裏面的手機錢包,支付、轉賬、AA制付款、搶紅包、叫車、團購、買戲票、慈善捐款,有些功能真的是想都未想過。

譬如逢星期三、六見到慈善團體動員老弱婦孺賣旗,以前我只是想,什麼時候可以進化到用八達通付款。自從有了八達通,已經少帶散紙出街,想必賣旗生意也大受影響。如果可以用這類通訊應用軟件買旗,就慳水慳力啦。

仲有同事不厭其煩傳授的搶紅包,被認為是當今最受歡迎最利於團隊建設的發明。大時大節,為人上司的掏點小錢,WeChat群組裏的同事必定齊鼓掌兼熱烈地彈琴熱烈地唱一片喜氣洋洋。

不過好可惜,在香港下載的WeChat,手機錢包甚至不是基本設定。香港移動金融的發展程度確實只有甲乙組的水準。

有冇咁堅呀WeChat?堅!不過點堅都冇用,唔用就係唔用。皆因通訊軟件呢家嘢,先入為主。用開WhatsApp,你會覺得WeChat語音通話根本無需要,到WhatsApp出咗語音通話,你先至會覺得係二十一世紀最偉大的發明,尤其身在外地而唔使錢傾電話的時候。

WeChat的公仔好得意。仲細咩?不過到WhatsApp出套唔同膚色的emoji,你又會好似執到寶咁。

還有朋友影響啦。朋友圈子都在WhatsApp,有幾十個群組,好難將成個人生搬去WeChat喎。

仲有呀,要公私分明呀嘛,WeChat做嘢又用,放咗工去邊度玩又畀人睇到晒,始終唔方便。不過諗落WeChat要加咗朋友先可以通訊,又睇唔到最後上線時間,兼且可以選擇畀邊個睇你的上載,私隱度仲高啦。

在一枱香港人和內地同胞之間,我突然變咗港官,表唔到態,惟有講句各具特色,有競爭先至有進步,草草收場。

[email protected]角都市

更多六角都市文章:

支持 StartupBeat

如欲投稿、報料,發布新聞稿或採訪通知,按這裏聯絡我們