You are currently at: ejtech.hkej.com
Skip This Ads
Don't Miss
Home   >   人物專訪   >   殺雞取卵的投資

殺雞取卵的投資

By on January 3, 2014

殺雞取卵

Kason 是小我數年的大學師弟。本來在投行高薪厚職，但工作內容悶到核爆。受著近來的創業氣氛所激勵，加上本身的技術底子也不賴，就膽粗粗的辭工創業。才幾個月時間，prototype 就造了出來，效果也不俗，就試著找投資者。

去美國前跟 Kason 聊過一會，轉眼半年。趁回港這段時間，當然就找 Kason 吃飯，問問他最近的情況。

遲到這個詞，未曾在 Kason 的字典出現過，但這天，他遲到了起碼 45 分鐘。原來當天他剛好去見了一個蠻有名的投資者，但看他一臉怒氣，也知道會面過程不太順利了。

「做咩咁燥呀個樣？傾唔成咩？」

「鬼咩。又係佢自己約我先嘅。勁大牌，遲左成兩個鐘，都算啦。一坐低就叫我講個 idea，都講唔到兩分鐘。佢就叫我停。」

這真的有點不尋常。按道理，也應該先了解多一點再作討論吧。

「跟住就話我個 idea 點樣唔得。叫我唔好睇表面，而家啲所謂 traction 都係假象，呢單野無得搞。」

「吓？咁佢約你出嚟做乜？」

「超，原來佢有 idea 想請人咋嘛。見我做到下嘢就嚟搵我啦。」

「咁或者都係一個機會呢？佢嘅 offer 應該都唔差架喎，至少應該有得搞丫。」

「Victor，我當日為乜走出嚟你唔係唔知架啦。你要我幫佢打工唔係唔得，但都要睇做乜架。佢叫我幫佢做，idea 本身唔錯，但佢同我講，co-founder 唔應該拎人工架，最多做得起就分啲 shares 俾我喎。」

「吓？幫佢做野仲無人工咁搞笑？佢食咗藥未呀？」

「佢見我無反應，就問我離職之前收幾錢人工，我照直講啦，佢竟然話『你咁後生做乜收咁高人工呀？』」

我也是今天才知道，工資水平是應該跟年齡掛勾的。

「我又唔想得失佢，就問佢個詳情啦，佢就話，單野做得起先再傾啦。即係叫我做義工啫。」

「errrrrrr…… 」我一時間不能處理這些資訊，認識 Kason 一段日子，我有信心他不會騙我的。

「唔駛 er 喇。我唔想得失佢，就話考慮下先啦。我都係想搞好手頭呢個 project 先。跟住佢就話幫我喇」

「咁咪好囉。。。」

「你聽埋先。佢話佢出面，幫我去借錢，一兩百萬（港元）唔係問題，但我要 commit 五年，再分幾十 percent share 俾佢就得。」

「幾多十呀？」

「多過一半啦。」

當年我是有聽過大陸類似的投資個案，美其名投資你，但先要拿大部份股份，再借錢給你，別忘記，要還的，而且利息比銀行還要高。

「嘩，佢唔好去搶？仲要係借錢咋喎，搞唔掂要還的話，條數點計呀？」

「唉。聽到咁，我都費事問落去。咪嘿嘿哈哈完左個會，話考慮幾日再覆佢，跟住就趕過嚟同大哥你食飯啦。」

看來，這頓飯 Kason 都應該會背脊骨落。

***

記得有前輩講過，他一定不會拿投資者的資金，因為不想被人家牽著鼻子走。的確，我見過好一些前輩，他們都沒有拿什麼投資，卻做得有聲有色，風生水起。

其中有一個我很敬佩的前輩，做了一個產品，拿下了全球八成以上的市佔率，年賺幾百萬美金，現在用那個產品做核心，擴展到其他戰線。這類創業家，要有膽色、領導才能、營商技巧，還要眼光獨到。要做到，又談何容易呢？

其實，我不敢說 Kason 這個個案是正常還是不正常。但「殺雞取卵」這個道理，應該不會錯的吧。而我後來得知，Kason 不是唯一的個案。也許，這對香港來說，是一個常態吧。

殺雞取卵

[編按：原標題《殺雞取卵》授權轉載於StartupBeat 圖：sponng CC Licensed]

支持EJ Tech



如欲投稿、報料，發布新聞稿或採訪通知，按這裏聯絡我們。