You are currently at: ejtech.hkej.com
Skip This Ads
Don't Miss
Home   >   人物專訪   >   CALL4VAN執笠及轉型宣言

CALL4VAN執笠及轉型宣言

By on January 8, 2015
call4van圖片

call4van圖片

早兩日報紙頭版刊登另一個貨van app獲得基金投資者注資1000萬美元，係繼香港第一大貨van app兩輪融資合共約1.2億港幣後，本地初創企業界(startup)裏面另一個佳話。

呃like容易　賺錢難

CALL4VAN作為香港最多人讚嘅貨van app (Facebook page超過8300個like) ，但生意大概只有對手嘅1%，當然感觸良多。古語有云：「呃like容易，賺錢難。」

雖然三個app過去18個月以嚟都係零收入，只有宣傳同開支，但面對對手有強勁財團撐腰，甚至可以調轉頭補貼司機，只能痛定思痛 ── 我哋真係捱唔住，決定「CALL4VAN客貨車」於2015年正式終結。

對手資源龐大

無可置疑，兩大app嘅宣傳方式、融資計劃、策略執行都非常成功。當我喺上年4月頭花咗一個通宵去惡搞「紅van」poster，甚至得到廣告界朋友點名讚許嘅時候，5月中對手就請來多位YouTube紅人嚟個「終極紅van惡搞」，並成為全香港最受歡迎宣傳片。 甚至係完全同一張相 ，我係朝早11點post，對手於下晝5點跟進 ，都因為有錢宣傳同冇錢宣傳嘅分別，佢哋得到嘅「讚好」足足多我24倍。

賺錢同時令基層司機受惠

我冇葡萄 (就呃你嘅)，但我明白除左天時地利，最重要其實係人。電影《衰鬼上帝》(Bruce Almighty) 入面有句對白 ：「將碗湯分開兩邊，並唔係神蹟，而係把戲；單親媽媽打兩份工，仲能夠抽空去睇個仔比賽，呢個先係神。」令我有所頓悟：能夠獲得千億注資，成為傳媒焦點當然係成功；但就我而言，能夠創業賺錢嘅同時，令到行業健康發展，基層司機真正受惠，傳統電召台同客嘅人情味得以保留，再可以每晚返到屋企，陪家人食住飯睇《來生不做香港人》，抽時間多陪患癌嘅媽媽，以至有機會同阿女出國比賽，咁樣先叫做成功。

或者你會覺得：有冇咁大貪，又要賺大錢，兼顧各方利益，仲要陪到屋企，邊有可能？

為司機利益拒絕投資者

其實冇。所以過去一年，因為擔心要為咗交盤數而犧牲行業同司機利益，我婉拒咗三位投資者。至於工作同家庭嘅平衡，喺香港都好難，但仍然值得嘗試。除咗我自己，我更希望公眾關注自僱司機得唔到合理報酬等問題，正因為呢啲因素，就係影響緊平衡家庭嘅背後原因。

成為幫助傳統中小型台轉型的平台　以司機主導

我雖誤判，面對巨大挑戰或有所恐懼，但絕對無愧無疚。今日起，CALL4VAN客貨車作為獨立貨van app嘅角色會逐漸淡出，隨之而來嘅係pivot (策略轉移)，成為真正以司機主導同幫助傳統中小型台轉型嘅平台。過去一年，客貨車業嘅「百佳、惠康」以銀彈戰術壟斷市場，CALL4VAN平台就希望聯合一眾「士多仔」令到呢個行業可以繼續百花齊放。至於能否成事，就要等「人」能否配合。

希望各位繼續支持「CALL4VAN客貨車平台」，關注本土行業，支持自僱司機。

lulu 8jan

CALL4VAN客貨車作為獨立貨van app嘅角色會逐漸淡出，隨之而來嘅係pivot (策略轉移)，成為真正以司機主導同幫助傳統中小型台轉型嘅平台。（CALL4VAN圖片）

文章原題：〈CALL4VAN執笠宣言〉，文章小標題為編輯所擬。

延伸閱讀：港Startups行動聲援 免費客貨車的士服務

支持EJ Tech



如欲投稿、報料，發布新聞稿或採訪通知，按這裏聯絡我們。