麥俊然搞電商 小波鞋踏出新天地 KICKS CREW誓做獨角獸 獲盈拓阿里領投

原文刊於信報財經新聞「周一人物」

香港投資風氣盛行，只要具市場觸覺，短線轉售亦可發展成長期事業，像波鞋電商平台KICKS CREW創辦人麥俊然（Johnny），若干年前因一次陪朋友炒賣波鞋經驗而悟出商機，進軍網購生意並做出成績，近月更完成600萬美元（約4680萬港元）A輪融資，由盈科拓展、阿里巴巴（09988）創業者基金及戈壁創投大灣區牽頭領投，目標是估值躋身獨角獸行列；小小波鞋，充滿無限可能。

波鞋是男孩至愛，可是對出身基層家庭的Johnny來說，屬學生時代負擔不起的奢侈品，「17歲嗰年搵暑期工，唔知點解搵極都搵唔到，連麥當勞都唔請，有位同我打波嘅朋友，屋企經濟環境唔錯，好鍾意波鞋呢啲潮流嘢，有日佢話不如畀300蚊我，陪佢一齊通宵排隊買對波鞋，因為每人限購一對，佢想買兩對，一對自己着、一對炒。」

陪朋友炒鞋 悟出「財路」

當時Johnny曾疑惑，友人為何願意付錢叫他排隊，後來才知該對原價799元的波鞋，未幾以近1800元轉售，「嗰陣啲同學返暑期工，講緊4000蚊一個月，（轉賣）咁就賺咗成千銀，如果我搵到幾對呢啲鞋，已經賺得多過做暑期工。」他靈機一觸，決心發掘這條「財路」，友人原本也有興趣參與，奈何對方母親以「炒賣無前途」為由禁止，結果只得Johnny孤身作戰。

投資考眼光，買賣波鞋亦然，「嗰陣資訊冇咁發達，美國有好多好紅嘅明星都有出個人品牌波鞋，當地一推出就畀人搶晒，但嚟到香港冇人識、冇人買，同埋好多生肖版：猴年、馬年，香港人覺得冇乜特別，美國人見到中文字會好鍾意。」於是Johnny成立公司，從本地波鞋街及店舖入貨，放上網購平台轉售，主攻美國市場，生意不俗，後來兼賣運動錶等其他潮物。

08年攻內地 堅持賣真貨突圍

消費者喜好各異，入貨固然眼光要準，選擇市場同樣需有敏銳觸覺；2008年美國率先引爆金融海嘯，以當地業務為重心的Johnny心知不妙，果斷轉攻內地，成立KICKS CREW，進軍淘寶、天貓、京東等平台；適逢北京奧運，全國掀起運動熱，「同一對鞋喺內地嘅賣出價仲高過美國，如果嗰陣我哋公司冇走，淨係focus（專注）美國，可能經營上會有好大困難。」

惟當年內地網購往往予人「難分真與假、人面多險詐」之感，他承認「初時有人（消費者）買真嘢，但唔多，同埋賣真嘢嘅都唔多。」隨着內地知識產權意識提高，開始知道真貨重要性，Johnny的公司堅持「賣真貨」做法，令顧客趨之若鶩，因當時網購經常會買到冒牌貨，反而賣真品的只得幾間。

Johnny賺到第一桶金後，漸漸有感平台限制太多，求人不如求己，2019年正式推出自家電商平台，發展一日千里，目前在社交媒體Instagram的追蹤人數超過100萬，客源主要來自美國，佔近80%，其次為加拿大、澳洲，香港則不足1%。

如今獲盈科拓展、阿里及戈壁等注資，可見KICKS CREW發展方向受到肯定，對Johnny來說僅屬開始，他不諱言終極目標是令平台發展成另一間亞馬遜（Amazon），志向遠大，「Amazon最初都只係賣書，我唔覺得互聯網要局限喺某個category（範疇），當然首先要開拓一個品類。」

「到我哋有一個消費群，其實想做social e-commerce（社交電商），即係加入social元素，有啲似Facebook、Instagram，畀人入嚟討論、留言、直播，希望做到個社群出嚟，而唔係單單買賣貨品咁冷冰冰。」Johnny如是說。

事業處於衝刺期，他已急不及待訂立下個目標，「到呢件事（平台）成功，或者我冇咁忙嘅時候，想搞啲環保。我本身有養狗，鍾意大自然，覺得個世界有好多嘢可以做得好啲，簡單嚟講香港有幾樣，其中廚餘問題幾得人驚。」

待事業成功 再追尋環保夢

「早排同做物流嘅人傾開，原來佢哋一板板咁將啲蛋糕掉去堆填區，譬如外國嘅（蛋糕）嚟到歪咗少少，成板掉喎！並非唔食得，只係唔靚，站在品牌立場我理解，但明明仲食得，如果可以畀有需要人士咪幾好；可能公司覺得咁做唔係咁好，無論如何，呢個問題非常恐怖，有啲大超市，食物未到期，只不過撞爛少少，又話要掉。」Johnny慨嘆。

除了廚餘，他也關心回收議題，「香港每日好多卡板嚟，你搵人收，要畀錢，而且人哋未必肯，呢啲唔係廢物，只因為木卡板無人回收，又話驚蟲蛀，呢件事唔係好啱，所以想喺物流上做返啲嘢，由於我比較熟⋯⋯啲紙盒貼過膠紙有痕，又話唔可以recycle，我覺得好唔合理。」

環保任重道遠，然而也要「眾志」始可「成城」，若能多幾個像Johnny這樣的有心人，相信循環再用不是夢。

採訪、撰文：許鎮邦

攝影：黃俊耀、受訪者提供

更多「周一人物」文章：

• Adobe吳振章熱愛大中華 愈難愈強 疫下接任區域舵手 預見10年商機
• iBonus數碼系統 智能卡追蹤播毒
• 戈壁創投唐啟波 「識睇人」造就佳績 看大局少理數字 催生眾多獨角獸

支持EJ Tech

如欲投稿、報料，發布新聞稿或採訪通知，按這裏聯絡我們。